ބައޮގްރަފީ އަދި އޮޓޯ ބައޮގުރަފީ

·        ބައޮގްރަފީ އަކީ ކޮބާ؟

          މިއީ އެހެން މީހެއްގެ ޙަޔާތާބެހޭގޮތުން ތަފްޞީލްކޮށް ލިޔާލިޔުމެކެވެ. މަޝްހޫރު، މޮޅުމީހުންނާ ބެހޭގޮތުން ބައޮގްރަފީ ލިޔެފައި ހުރެއެވެ. މި ލިޔުން ލިޔެފައި ހުންނަނީ 3 ވަނަ މީހާގެ ނަޒަރުންނެވެ.

·        އޮޓޯބައޮގްރަފީ އަކީ ކޮބާ؟

         މިއީ މީހަކު އެމީހާގެ އަމިއްލަ ޙަޔާތާ ބެހޭގޮތުން ލިޔެފައިވާ ލިޔުމެކެވެ. އޮޓޯބައޮގްރަފީ ލިޔާނީ ފުރަތަމަ މީހާގެ ނަޒަރުންނެވެ.

·        އޮޓޯބައޮގްރަފީ އާއި ބައޮގްރަފީގައި ހިމެނޭ ބައިތައް:

-         ފެށުން / ތަޢާރަފް:

         މިބައިގައި ގެންނާނީ ލިޔާނީ ކާކާބެހޭގޮތުން ކަމާއި، އުފަންވީ ދުވަސްވަރެވެ. އަދި ޢާއިލާގައި ހިމެނޭ އެންމެންގެ ނަންތައް ނުހިމެނިޔަސް މަންމައާއި ބައްޕަގެ ވާހަކަ ހިމަނައިލަންވާނެއެވެ.

-         ޙަޔާތުގެ އުސްއަލިތައް :

    މިއީ މައިގަނޑުގައި ހިމެނޭ ބައިކަމަށްވާތީ މިބައި ގެންނަންވާނީ ވީހާވެސް ބާރުގަދަވާފަދަ ގޮތަކަށް، ދީފައިވާ ސުވާލުގައި ބޮޑަށް ބާރުއަޅާފައިވާ ބަޔަކަށް އަމާޒުވާގޮތަށެވެ. އެގޮތުން އެ ލިޔާ ޝަޚްޞިއްޔަތުގެ މުހިއްމު މަޢުލޫމާތު ހިމަނާއިރު އޭނާގެ ތަޢުލީމީ ޙަޔާތުގެ މައްޗަށް ކުރުވާހަކަ ކޮޅަކާއި، އެދާއިރާއިން ލިބުނު ކާމިޔާބީތަކުގެ މައްޗަށް ބޮޑަށް ބާރު އަޅަންވާނެއެވެ. ކާމިޔާބު ޙާޞިލްކުރުމުގައި ދިމާވި ދަތިތަކާއި، ލިބުނު ތަޖުރިބާއާއި، އިޙްސާސްތައް ސިފަކޮށްދީފައި ހުންނާނީވެސް މިބައިގެ ތެރޭގައެވެ. ޅަފަތުގެ ދައުރާއި، ތަޢުލީމީ ދައުރާއި، ޢަމަލީ މައިދާން ނުވަތަ އޭނާގެ ތަޖުރިބާތައް މިބައިން އެނގެންވާނެއެވެ.

-         ނިންމުން :

           މިއީ ބައޮގްރަފީ / އޮޓޯބައޮގްރަފީ ލިޔާ ޝަޚްޞިއްޔަތާ ބެހޭގޮތުން ޖުމްލަގޮތެއްގައި ދައްކާ ވާހަކަގެންނަ ހިސާބެވެ. އޮޓޯބައަގްރަފީ ނުވަތަ ބައަގްރަފީގެ ނިންމުން ގެންނައިރު މިހާރު އެޝަޚްޞިއްޔަތެއް ދުނިޔޭގައި ހުރިކަމަށްވާނަމަ އެވާހަކައާއި، އަދި ޒަވާޖީ ޙަޔާތެއް ފަށާފައިވާނަމަ ޢާއިލާއާއި ދަރިންތިބި ޢަދަދު ނޫނީ ދުނިޔެ ދޫކޮށްފައިވާނަމަ އެކަން ބަޔާންކުރަންވާނެއެވެ. (އޮޓޯބައޮގްރަފީގައި ދުނިޔެ ދޫކުރިވާހަކައެއް ނުގެންނާނެއެވެ.)

          މިބައިތައް ހިމެނޭގޮތަށް ލިޔާއިރު ވިސްނާނީ އެޝަޚްޞިއްޔަތުގެ ދިރިއުޅުމުގެ މަރުޙަލާތަކުގެ ވާހަކަ ގުޅިގެން އަންނަގޮތަށް އަދި އެވާހަކަތަކުގެ މެދުގައި ފްލޯއެއް ހުންނާނެހެން ހާދިސާތަކާއި، ހުށަހަޅާ ކަންތައްތައް، ތަރުތީބުން ބަޔާންކުރުމަށެވެ. ބަޔާންކުރުމުގެ ރީތިކަމަކީ ލިޔުންތެރިކަން ވަރުގަދަ ކޮށްދޭނޭ ކަމެކެވެ.

ބައޮގްރަފީގެ ނަމޫނާ:

ޚިދުމަތްތެރި ދިވެހި ދަރިއެއް

     އަލްމަރުޙޫމް ޑރ. މުޙައްމަދު އާދަމް ރަފIޢަކީ، ރާއްޖެ ދުށް ކަށީގެ ބަލިތަކަށް ޚާއްސަ އެންމެ ފުރަތަމަ ޑޮކްޓަރެވެ. އޭނާއަކީ ކ. ތުލުސްދޫ މާޖެހިގޭ މޫސާ ރަފީޢާއި ދޮންލުބޯގޭ މަރިޔަމް ރަޝީދާގެ 5 ކުދިންގެ ތެރެއިން އެންމެ ދޮށީ ދަރިފުޅެވެ. އޭނާ އުފަންވެފައިވަނީ 19 ޑިސެމްބަރ 1982 ގައެވެ.

     އުމުރުން އެންމެ 7 އަހަރުގައި އޭނާވަނީ، މަދަރުސަތުލް ސަނިއްޔާގެ ފިރިހެން ކުދިންގެ ގޮފީގައި ތައުލީމު ހާސިލuކުރުމަށްޓަކައި މާލެ އައިސްފައެވެ. އެންމެ ކުޑައިރުއްސުރެ އޭނާ ފާހަގަ ކުރެވިފައިވަނީ ކިޔެވުމަށް ޝައުuqވެރިވާ، ތޫނުފިލި ކުއްޖެއްގެ ގޮތުގައެވެ. އުމުރުން 18 އަހަރުގައި، އަމިއްލަ ފަރާތެއްގެ އެހީއާއެކު މަތީތައުލީމު ޙާސިލު ކުރުމަށް އިންޑިޔާއަށް ދިޔައެވެ. އޭނާ ޚާއްސަވީ ބޭސްވެރިކަމުގެ ތެރެއިން ކަށީގެ ބަލިތަކުގެ ދާއިރާއަށެވެ.

     އިންޑިޔާގައި 8 އަހަރު ކިޔެވުމުގައި ހޭދަކުރުމަށްފަހު އެނބުރި މާލެ އައިސް ވަޒީފާ އަދާކުރަންފެށީ ސެންޓްރަލް ހޮސްޕިޓަލުގައެވެ. އޭނާއަކީ، އެދާއިރާގައި ހަރަކާތްތެރިވި ފުރަތަމަ ދިވެއްސަށްވުމުން، ކޮންމެވެސް ވަރަކަށް މީހުންގެ ފާޑުކިޔުންތައް އޭނާއަށް ރައްދުވިއެވެ. އަދި އެންމެ ކުރީކޮޅު މީހުންގެ އިތުބާރު ހޯދުމުގައި ދަތިތަކާވެސް ކުރިމަތިވިއެވެ. ނަމަވެސް އޭނާގެ ހިތްހެޔޮ މިޒާޖާއި ހީވާގި މަސައްކަތުން، މީހުންގެ ލޯތްބާއި ޤަދަރު ވަރަށް އަވަހަށް ހޯދިއެވެ.

     ޑރ. މުޙައްމަދު އާދަމް ރަފީޢުގެ ޚާއްސަ ޚިދުމަތްތަކަށް ބަލާއިރު، ކަށީގެ ބަލިތަކަށް ފަރުވާދޭ އަމިއްލަ ކުލިނިކެއް އޭނާ ހިންގާފައިވާކަން ފާހަގަ ކޮށްލެވެއެވެ. މީގެ އިތުރުން ރާއްޖެތެރޭ ރަށްތަކުގައި، އަދި ޚާއްސަކޮށް އޭނާގެ އުފަންރަށް ކަމުގައިވާ ކ.ތުލުސްދޫގައި ކަށީގެ ބަލިތަކާމެދު ހޭލުންތެރިކަން އިތުރު ކުރުމުގެ ގޮތުން ތަފާތު މަޝްރޫއުތައް އޭނާވަނީ ކުރިއަށް ގެންގޮސްފައެވެ.

     ޑރ. މުޙައްމަދު އާދަމް ރަފީޢު ނިޔާވެފައިވަނީ 3 މަސްދުވަހު ލޭގެ ކެންސަރު ބަލީގައި އުޅުމަށްފަހު، 28 ޑިސެމްބަރ 1989 ގައެވެ. ނިޔާވިއިރު އުމުރަކީ 61 އަހަރެވެ. ނިޔާވިއިރު 2 އަނބިންނާއި، 3 ފިރިހެން ކުދިންނާއި 2 އަންހެން ކުދިން އެބަތިއްބެވެ. އޭނާ ނިޔާވިތާ 18 އަހަރު ވެފައިވީއިރުވެސް، އޭނާގެ އަގުހުރި ޚިދުމަތްތަކުގެ މަތިން އަދިވެސް ދިވެހިން ހަނދާން ކުރަމުން ދެއެވެ. މިކަމުގެ ދަލީލަކީ، އޭނާގެ ހަނދާނުގައި 1996 ވަނަ އަހަރު ބޭސްވެރިކަމުގެ ދާއިރާއިން އާންމު ޚިދުމަތުގެ އިނާމް ސަރުކާރުން ދެއްވުމެވެ. މާތް ﷲ، އޭނާއަށް އާޚިރަތުގައި ހެޔޮ ނިޢުމަތް ދެއްވާށިއެވެ.